Urola Kostako Hitza 08/03/06

Zarautz »

Elikadura eta osasuna uztartuz, abian jarri duten 'D'elikatuz Bizi' kanpainan, hainbat ikastaro emango dute «ohitura egokiak irakasteko»

Tripazorriak esnatzeko moduko errezetak egiten irakatsiko dute, orekatuak eta osasungarriak diren osagaiekin. D'elikatuz Zentroak Gipuzkoa osoan zehar hainbat ikastaro antolatu du elikadura eta osasuna uztartuz. Ikastaro horietako bat Zarauzko Aiala Sukaldaritza Eskolan emango dute.

D'elikatuz Zentroa 2005eko martxoan Ordizian irekitako Elikadura eta Gastronomia gunea da. Bertako kideen helburua herritarrengan elikadura eta gastronomiari buruzko interesa piztea da. Horretarako, gai horiei buruzko ezagutza zabaltzea beharrezkoa dela pentsatzen dute, eta ikastaroak antolatu dituzte. Bide batez, elikadura osasungarria sustatzeko jarduerak antolatzen saiatzen dira.

Hilabete honetan D´elikatuz Bizi izeneko kanpaina berria jarri dute abian. Kanpaina honen bultzada nagusia Ordiziako Udalaren eta Kutxa Gizarte Ekintzaren aldetik jaso dute.

Aiala Sukaldaritza Eskolan, martxoa eta ekaina bitartean, hiru alditan emango dute ikastaro berdina. Lehenbizikoa martxoaren 13tik apirilaren 9a bitartean, bigarrena apirilaren 24tik maiatzaren 21era, eta hirugarrena maiatzaren 22tik ekainaren 18ra.

Ikastaroa egiteko baldintza bakarra 18 urte baino gehiago izatea da. Izena emateko 943 882290 telefonora deitu behar da, eta ondoren bost euro ordaindu.

Dena den, D'elikatuz Bizi kanpainak, ikastaroez gain, baditu beste hainbat atal ere. Elikadura osasungarriari buruzko trebakuntza eta arreta berezitua ere jorratuko dituzte. Batetik, EHUren Donostiako kanpusean, elikadura jokabideari buruzko zenbait ikastaro emango dituzte ikasle eta irakasleei zuzenduta. Bestetik, Gipuzkoako ACABEk (Bulimiaren eta Anorexiaren aurkako Elkartea) aholkularitza eskainiko du, telefono eta mezu elektronikoen bidez.

Azkenik, Gipuzkoan elikadura eta osasuna uztartuz egindako ikerketa lanei buruzko azterketa egingo da, eta urte amaieran emaitzak aurkeztuko dituzte jendaurrean.