Goierriko Hitza 06/03/04

Gizartea »

Elikadura osasungarria bultzatuko du D'elikatuzek.

Heziketa kanpainaren barruan askotariko ekintzak antolatu ditu zentroak.

Elikadurari buruzko heziketa-kanpaina da D'elikatuz Bizi. Helburua herritarrei elikadura osasungarriaren garrantziaz ohartaraztea da. Kanpainaren barruan ekimen ugari antolatu dituzte abendura bitartean. Hasteko, elikadura osasungarriari buruzko ikastaroa jarri dute martxan.

Ekitaldien aurkezpena atzo goizean egin zuten D'elikatuz zentroan. Bertan izan ziren Alejandra Iturrioz alkatea, Jesus Mari Alkain Kutxaren Gizarte Ekintzako zuzendaria, Iñaki Izagirre Gipuzkoako sukaldaritza eskolen ordezkaria, Iñigo Ochoa de Alda AVAPSIko lehendakaria eta EHUko irakaslea, Pedro Ramos EHUko irakaslea eta Leire Arandia D'elikatuz zentroaren zuzendaria.

Kanpainak lau alor izango ditu: nutrizioa eta gastronomia, trebakuntza eta arreta espezializatua, ikerkuntza eta zabalkundea. Nutrizioaren eta gastronomiaren atalean sukaldaritza osasungarriari buruzko ikastaroa antolatu dute. Ikastaroarekin emango diote hasiera kanpainari.

Kurtsoa Gipuzkoako bost sukaldaritza eskoletan emango dute, ekainera bitartean. Goierrin Ordiziako lanbide eskolan emango dute. Ikastaroa hiru alditan eskainiko dute, eta bost euro balio du.

Elikadura jokabidearen gorabeherei buruzko zenbait ikastaro ere antolatu dituzte Donostiako EHUko campusean. Gipuzkoako Bulimiaren eta Anorexiaren Aurkako Elkarteak (ACABE) ere parte hartuko du kanpainan. Elikadura-jokabideen gorabeherak dituzten guztiei aholkularitza eskainiko diete telefonoz eta mezu elektronikoz.

Bi ikastaro horietaz gain, D'elikatuzetik jakinarazi dutenez azterketa bat egingo dute elikadura osasunari buruz Gipuzkoan.

Ikerkuntzaz gain zabalkundea landu nahi dute. D'elikatuz Bizi Gipuzkoan barrena ibiliko da menu osasungarri eta pertsonalizatuak eskaintzen dituen modulu informatiko batekin. Honako leku hauetan jarriko dute ibilgailua: unibertsitate campusetan, azoka gastronomikoetan, merkatal gune handietan...